Ордабасы ауданының әлеуметтік-экономикалық дамуының маңызды құрамдасы – инвестициялық жобаларды жүзеге асыру. Аудан аумағында индустриалды аймақтарды кеңейту, жаңа кәсіпорындар мен инфрақұрылым нысандарын салу үшін жер қатынастары саласында белсенді жұмыс жүргізілуде.
2025 жылы Бадам индустриалды аймағына жақын жерлерден инвестициялық жобаларды іске асыру мақсатында 8 гектар жер телімі аудан қорына қайтарылды. Жер иеленушімен келіссөздер нәтижесінде аудан әкімдігінің қаулысымен Түркістан әлеуметтік-кәсіпкерлік корпорациясына берілді. Бұл шешім аудан экономикасын дамыту, жаңа кәсіпорындар салу және жұмыс орындарын ашуға мүмкіндік береді.
Сонымен қатар, индустриалды аймақты кеңейту үшін жалпы 500 гектар ауыл шаруашылығы мақсатындағы жер телімдерін мемлекет мұқтажы үшін мәжбүрлеп иеліктен шығару туралы қаулы қабылданды. Аталған жерлердің бағалау құны – 1 млрд 274 млн 971 мың 055 теңге. Бұл қаражат аудандық бюджетке түсіріліп, инфрақұрылымдық жобаларды қаржыландыруға бағытталды.
Жер қатынастары саласында жүргізілген жұмыстардың бірі – Рәміздер аллеясының құрылысы үшін мемлекет мұқтажына жер учаскелерін қайтару. Қажымұхан ауыл округінде орналасқан жеке меншік 0,02 га және 0,035 га жер телімдері аудандық қорға қайтарылды. Аталған шаралар қоғамдық жобаларды жүзеге асыруға, тұрғындарға ыңғайлы ортаны қалыптастыруға мүмкіндік береді.
Аудан әкімдігінің жер қатынастары саласында жүргізіп отырған белсенді жұмыстары инвестициялық жобаларды іске асыруға жағдай жасап қана қоймай, жер пайдаланушылары мен инвесторлардың құқықтарын қорғауды қамтамасыз етеді. Жерді тиімді пайдалану, мемлекеттік бағдарламаларды іске асыру және инфрақұрылымды жаңғырту арқылы ауданда жаңа кәсіпорындар мен әлеуметтік нысандар салынып, жұмыс орындары ашылуда.
Қорытындылай келе, Ордабасы ауданының инвестициялық жобаларды жүзеге асырудағы тәжірибесі аймақ экономикасының дамуына маңызды үлес қосуда. Жер қатынастары саласында жүргізілген жүйелі жұмыс, инфрақұрылымдық жобаларды қаржыландыру, индустриалды аймақтарды кеңейту және қоғамдық нысандарды салу ауданның тұрақты экономикалық дамуына негіз қалайды. Бұл бағыттағы шаралар жаңа жұмыс орындарын ашуға, ауыл халқының әл-ауқатын арттыруға және жер ресурстарын тиімді пайдалануға мүмкіндік береді.
Comments