Ордабасы ауданы ауыл шаруашылығы саласында ерекше маңызды орынға ие, әсіресе суармалы егістік жерлерді тиімді пайдалану мәселесі аудан экономикасының дамуына тікелей әсер етеді. 2025 жылы ауданда суармалы жерлердің көлемін ұлғайту, су үнемдеу технологияларын енгізу және канал желілерін жаңғырту бойынша кешенді шаралар жүзеге асырылды. Аудандағы жалпы егістік жер көлемі 88,1 мың гектар болса, оның 34,4 мың гектары суармалы жерлерді құрайды. Суармалы жерлерді тиімді пайдалану мақсатында 9 негізгі каналға күрделі жөндеу жұмыстары жүргізіліп, оның ішінде «ЛБК», «Р-11-С» каналдары толық пайдалануға берілді. Сонымен қатар, «Қараспан» магистралды каналы аяқталуға жақын, бұл ауыл шаруашылығы дақылдарының мол өнім алуына мүмкіндік береді.
Су үнемдеу технологияларын енгізу де өзекті мәселе болды. 2025 жылы ауданда 6 925 гектар жерге заманауи су үнемдеу жүйелері орнатылды. Оның ішінде 1 395 гектарға тамшылатып суғару, 200 гектарға жабырлатып суғару технологиясы енгізілді. Жеңіс ауыл округінде «ПК Дала» АӨК мақта дақылын 650 гектар жерге тамшылатып суғару тәсілімен егіп, гектарына 45 центнер өнім алды. Бұл тек суды үнемдеумен шектелмей, өнімнің сапасы мен көлемін арттыруға мүмкіндік береді. Аталған технологиялар 2030 жылға дейін 15 891 гектарға енгізілетін жоспарға сәйкес кеңейтіледі.
Каналдарға механикалық тазалау жұмыстары да жүргізіліп, 51 каналдың 132 шақырымында ағын су жүйесі жаңартылды. Бұл шаруаларға заманауи технологияларды пайдалана отырып егістік алқаптарын суару мен өнімділікті арттыруға жол ашады. Сондай-ақ, жаңа жобаларды іске асыру арқылы ауданның суармалы жерлері болашақта да тұрақты өнім алу үшін сенімді қорға айналмақ. Атап айтқанда, Боралдай су қоймасының құрылысы қолға алынуда. Су қоймасының жалпы сыйымдылығы 45,5 млн м³ құрап, Ордабасы, Арыс, Отырар, Сауран аудандары мен Түркістан қаласындағы 67 мың гектар суармалы жерді ағын сумен қамтамасыз етуге мүмкіндік береді.
Ауданның ауыл шаруашылығы өнімін арттыруға бағытталған бұл шаралар тек егістік алқаптарын ғана қамтып қоймай, ауыл тұрғындарының әл-ауқатын көтеруге де ықпал етеді. Суармалы жерлердің кеңеюі мал азығын қамтамасыз етуге, дәнді дақылдар мен бақша өнімдерінің мол болуына жағдай жасайды. Сонымен қатар, бұл ауыл тұрғындарын жұмыспен қамтып, агроөнеркәсіп кешенін дамытуға жаңа мүмкіндіктер береді. Аудандағы су ресурстарын тиімді пайдалану, каналдарды жаңғырту және су үнемдеу технологияларын енгізу Ордабасы ауыл шаруашылығының тұрақты дамуына негіз болып отыр.
2025 жылғы атқарылған жұмыстардың нәтижесінде ауданның суармалы жерлері тиімді пайдаланылып, өнім көлемі артты. Бұл шаралар ауыл шаруашылығы өнімінің сапасы мен экспорттық әлеуетін жақсартуға, ауыл тұрғындарының табысын көбейтуге және ауданның аграрлық әлеуетін нығайтуға бағытталған кешенді саясаттың көрінісі болып табылады. Ордабасы ауданы суармалы жерлерді дамыту арқылы Қазақстандағы аграрлық дамыған өңірлердің бірі ретінде өз орнын нықтап отыр.
Comments