Наурыз айы Ордабасы ауданының аграрлық саласы үшін нағыз дайындық кезеңі болып табылады. Дала жұмыстарының басталуы, егіс науқанына дайындық, мал азығын толықтыру, техника мен жанармай қорын жетілдіру – барлығы осы айда өзара үйлестіріледі. Аудан экономикасының негізгі қозғаушы күші – ауыл шаруашылығы саласы болғандықтан, наурыз айындағы шаралардың нәтижесі жылдық өнім көлемін арттыруға тікелей әсер етеді.
Аудандағы егістік жер көлемі – 88,1 мың гектар болса, оның 34,4 мың гектары суармалы алқаптарға жатады. Наурыз айында шаруалар әрбір гектарды тиімді пайдалану үшін жоспарланған дақылдарды нақтылап, егіс науқанына дайындықты бастайды. Масақты дақылдар, дәнді жүгері, майлы дақылдар мен мақта өсіру көлемдері нақтыланады. Сонымен қатар, көкөніс, картоп және бақша алқаптарын өңдеуге арналған техника мен құрал-жабдықтар дайындалады.
Наурыз айында 6,2 мың тонна жеңілдетілген жанармай бөлінген болса, оның көктемгі егіс жұмыстарына 4,3 мың тоннасы пайдаланылады. Бұл көрсеткіш шаруалардың дала жұмыстарына уақытылы шығуына кепілдік береді. Жанармайдың жеткізілуі мен бөлу кестесі аудандық ауыл шаруашылығы бөлімінің арнайы бақылауында.
Ауыл шаруашылығы дақылдарын егіс алқаптарына орналастырудан бөлек, тыңайтқыштарды қолдану наурыз айында басты назарда. 14,9 мың тонна минералды және органикалық тыңайтқыш шаруаларға уақытылы жеткізіліп, топыраққа себіледі. Бұл шара өнімнің мол және сапалы болуына әсер етеді.
Ордабасы ауданында суармалы жерлерді тиімді пайдалану наурыз айында ерекше маңызға ие. Биылғы жылы каналдарды күрделі жөндеу, механикалық тазалау және су үнемдеу технологияларын енгізу жұмыстары жүргізілуде. 73 шаруа қожалығы 1 595 гектар жерге тамшылатып және жабырлатып суғару тәсілдерін енгізді. Бұл – өнім көлемін арттырумен қатар, суды үнемдеудің тиімді жолы.
Наурыз айында мал шаруашылығына да ерекше көңіл бөлінеді. Ірі қара мал, қой, жылқы және түйе қыстан шыққан соң тез арада жайылымға шығарылады. Мал азығын дайындау, жем-шөппен қамтамасыз ету жұмыстары қолға алынады. Сонымен қатар, ветеринарлық тексерулер жүргізіліп, төлдің қауіпсіздігі қамтамасыз етіледі.
Жер қатынастары саласында да наурыз айында маңызды жұмыстар атқарылады. Аудандық комиссия жер учаскелерін пайданылмай жатқан жерлерден мемлекет меншігіне қайтару, жер дауларын шешу және жаңа аукционға шығару бойынша шараларды үйлестіреді. Наурыз – ауыл тұрғындары мен кәсіпкерлер үшін жаңа инвестициялық жобаларға жер бөлу кезеңі.
«Ауыл аманаты» бағдарламасы аясында наурыз айында жаңа кооперативтер құрылады, тұрғындарға жылыжай салуға, егін шаруашылығын кеңейтуге қаржылай көмек көрсетіледі. Шұбарсу ауыл округінен 15 гектар жерге жылыжай кешені салынды, бұл тұрғындардың тұрақты табыс алуына мүмкіндік береді.
Қорытындылай келе, наурыз айы Ордабасы ауданында егіс науқанының басталуының негізгі кезеңі болып саналады. Дала жұмыстарына дайындық, тыңайтқыш пен су ресурстарын дайындау, мал азығын толықтыру және жер қатынастары саласындағы үйлестіру жұмыстары – жылдық өнімнің мол болуына тікелей әсер етеді. Наурыз айында атқарылған жұмыстар аудандағы ауыл шаруашылығының тұрақты дамуы мен экономикалық өсімін қамтамасыз етеді.
Comments